Dr. Aytən Seyidova

Mən Slavyanka kəndində 5 il rus bölməsində oxudum və məktəbi əla qiymətlərlə bitirdim. Daha sonra yenidən Tbilisiyə qayıdaraq, Zakafkaziyada ilk tibb texnikumlarından biri olan Tamara adına 2 nömrəli Dövlət Tibb Texnikumunun mamalıq fakültəsinə qəbul oldum. 2000-ci illərdə texnikumu əla qiymətlərlə bitirdiyim üçün ali təhsilimi davam etdirmək imkanı qazandım və stomatologiya fakültəsinin 2-ci kursuna qəbul edildim. 2003-cü ildə universiteti bitirdim.

Qeyd etmək istəyirəm ki, babam, atam və hazırda qardaşlarım da stomatoloqdurlar və Tbilisinin tanınmış, savadlı və bacarıqlı həkimləri sırasındadırlar. Böyük qardaşımın 3, kiçik qardaşımın isə 1 klinikası fəaliyyət göstərir.

Daha sonra Azərbaycana gəlin köçdüm və 4 övlad anası oldum. Uşaqlarımı müəyyən yaşa çatdırana qədər heç bir iş fəaliyyəti ilə məşğul olmadım. 2006-cı ildə Azərbaycan vətəndaşlığını aldım.

2014–2015-ci illərdə tibb texnikumu diplomumu, daha sonra isə tibb institutu diplomumu təsdiq etdirdim. 2016-cı ildən etibarən inyeksion kosmetologiya sahəsində fəaliyyət göstərirəm. Məlum olduğu kimi, inyeksion kosmetologiya tibbin bir sahəsi olsa da, universitetlərdə bu sahə üzrə ayrıca fakültə mövcud deyil. Bu səbəbdən müxtəlif kurs və təlimlərdə iştirak etmişəm.

İlk addımlarımı Bakı şəhərində yerləşən Paramed klinikasında atmışam. Burada həm aparat, həm də inyeksion kosmetologiya üzrə təlimlər keçmişəm. Lakin mənim xarakterim hər bir mövzunu dərindən öyrənməkdir. Bu səbəbdən həm yerli, həm də xarici kurslarda iştirak edərək biliklərimi daim artırmışam və bu prosesi hələ də davam etdirirəm.

Bu günə qədər on minlərlə xanıma xidmət göstərmişəm və onların təxminən 95%-i nəticələrdən tam razı qalıb. Müştərilərim illərdir məni yalnız kosmetoloq kimi deyil, eyni zamanda psixoloq kimi də dəyərləndirirlər. Onlar mənim yanımda özlərini daha güvənli hiss etdiklərini bildirirlər. Bu isə mənim üçün ən böyük qazancdır.

Eyni zamanda, bilik və təcrübələrimi kolleqalarım ilə bölüşür, Gürcüstan və Azərbaycan üzrə yüzlərlə seminar keçirirəm. Auditoriya qarşısında çıxış etmək asan olmasa da, həm nəzəri, həm də praktik biliklərimi paylaşmaq mənə böyük zövq verir.

İllər ərzində müxtəlif şirkətlərdə həkim-texnoloq kimi də fəaliyyət göstərmişəm. Bundan əlavə, bir çox kolleqalarımın çətin klinik hallarında onlara dəstək olmuş, həm onların, həm də pasiyentlərinin problemlərinin həllinə kömək etmişəm.

İnanıram ki, hər bir insan bu dünyaya müəyyən bir missiya ilə gəlir. Mən öz missiyamı tapmışam – xanımların özlərinə olan inamını qaytarmaq, onların güzgüyə baxarkən özlərini xoşbəxt hiss etmələrinə kömək etmək. Onların üzündəki dəyişimi və sevinc hissini görmək məni ikiqat xoşbəxt edir.